صور شعريه روعه

راسي ما دنكه جنت بس بالصلاه
وهسه كل لحظة غياب تدنكة
.
.
ولو نص ساعه مر لخاطري وروح
لا عيد اليجي تلكاني شايب
.
.
اجت عينك بعيني ومادرت بال
جنت مشغول بيك اعذرني ماشفتك
.
.
انت ترجيه وآنه أذن صفيت
بية تجرح لكن محليني
.
.
على كول الصدك علمت روحي تكول
وعيون الجذب فاكسهن بصبعي
.
.
ادور بالدروب الحاجي بيها وياك
بلكي كلمة منك طايحة أسمعها
.
.
أبداعت أمة وما رجعلي
ابيش احلفه بداعتي؟؟؟
.
.
امس طاريك مرني ودغدغ البال
وخربان من الضحك ليهسه بالي
.
.
لعابه هدولي بسبب فركاك
كل ضنهم طفل جي ابجي بصياح
.
.
شعب خارج النطاق التغطية يعيش
اذن شيسوي بأرقام الحكومة؟
.
.
كلبت بأوراقي بس أسمك لكيت
وماكو غير اسمك أسم بأوراقي
.
.
تصدك بعد ارجع واكول أهواك ؟
هواك تراب صار وحيل يخنكني...
.
.
انه كاتبلك احبك من زمان 
وأنت كاتبلي نسيت شطولها
.
.
انت مثل الماي يلخاين صفيت
لا طعم لا لون لا بي رائحة
.
.
حلم وردي جنيتك كلت ارتاح
بس طوخته حيل وصار موت احمر
.
.
الأوف عند الله جبيرة
شحال لو والد زعل؟
.
.
عفتني بنار ياهو الكلك ابراهيم؟
وفوكاها بالكواغد كمت تطفيها
.
.
يعجبني الحجاب بروس البنيات
بس ارفض بنات افكاري احجيها
.
.
آدم عراقي طلع واحنه اكلنة تبن
من طكلة تفاحه ( للمرحوم عبدالحسين الحلفي )
.
.
انتقلت لرحمة الله شعندك وياي؟
هم تريد تاخذ رحمة الله ؟
.
.
فراكك لو بحر اعبر واجيك بليل
وشيعبرة اذا جرح بينك وبيني؟
.
.
محبسك مبتور
وآنه اصبع ذهب
.
.
لا تذب لومك على القسمة وياي
انت الماردتني القسمه شعليها؟
.
.
دمعه بشط عشرتك راحت وية الروج
اذا رايدنا نرجع غربل الماي
.
.
عليك بداعة امك سلم من اتفوت
لتخلي الشماته تكول عايفني
.
.
أنا الشوالي جني بدوري الابطال
شفت حسنك كبالي وصحت مش ممكن
.
.
اذا كلمن يموت نموت وياه
مو بيد الله يعني الموت عالواهس
.
.
افك عيني واذاني من يمر طاريك
لان سمعي قليل سمعت بعيوني
.
.
لخاطر الله راح اكلك بس تعال
شنهي ماعند الله يمك خاطر؟
.
.
جنة متفقين عالملكى شجاك
رحت تركض جبت بيدك فركه
.
.
عيوني طاحت من مشت يوم الوداع
وجفوفي مشغوله بوداع خيالها
.
.
جروح جدد عندي منك بس تعال
هواي جدد عندي وبموديلهة
.
.
من صغري جنت على اذني أشد غربيل
خاطر ما يطب بس الصدك سمعي
.
.
جان يم الغيم راسي ومن مشيت
صار يم رجلية أبشرك راسي

مصدر: صور شعريه قفشات عراقيه\الكاتب:Alaa king

Posted in: قفشات عراقيه